Лета – час прымаць новыя выклікі. Першага чэрвеня ў межах Фэсту “Кілямэтар грамадзкай актыўнасьці” пройдзе Жывая Бібліятэка.
На ёй можна будзе пазнаёміцца з новымі людзьмі, атрымаць ежу для разважанняў, навучыцца прымаць і разумець, проста паразмаўляць і паслухаць ці, можа, знайсці людзей, падобных да сябе…
Падчас Жывой Бібліятэкі вы паразмаўляеце з Кнігамі – людзьмі, якія маюць спецыфічную прафесію, незвычайны досвед, нязвыклы для большасці светапогляд ці занятак. Часта ў дачыненні да Жывых Кніг існуюць стэрэатыпы ў грамадстве, а самі Кнігі прадстаўляюць стыгматызаваныя сацыяльныя групы.
Адкрыць для сябе новыя бакі жыцця, навучыцца крытычна ставіцца да таго, што адбываецца, мець адвагу быць шчырым да іншых людзей і паважаць іх – ці здольныя вы пераадолець гэтую дыстанцыю?
Уваход вольны! Па жаданні можна прайсці папярэднюю рэгістрацыю да 20:00 31 траўня па спасылцы http://bit.ly/2XPSRFD ці ў форме ніжэй. Усе зарэгістраваныя чытачы атрымаюць электронную версію поўнага каталога Кніг.
Чакаем вас і вашых сяброў на Жывой Бібліятэцы!
Мерапрыемства будзе праходзіць у фармаце міжнароднай метадалогіі Human Library ў межах фэсту “Кілямэтар грамадзкай актыўнасьці” і Тыдня даступнасці, ініцыяванага Офісам па правах людзей з інваліднасцю.
*Прастора даступная для людзей у вазку.