Самае карыснае ад Іншых за 2025 год: анлайн-квіз, гісторыі людзей, даследаванне і шмат чаго яшчэ

У гэтым артыкуле мы дзелімся з вамі вынікамі нашай працы ў 2025 годзе. Навошта яго чытаць? Прынамсі таму, што шмат таго, што мы зрабілі ў 2025 годзе, будзе карысна вам і цяпер. І калі гэта нейкім чынам вас абмінула — трэба гэта тэрмінова выпраўляць!

Чытайце, вывучайце і забірайце ў сваю працу і жыццё. А калі хочаце цалкам азнаёміцца з вынікамі нашай працы за 2025 год — глядзіце поўную справаздачу.

Распавялі 30+ гісторый людзей пра розны жыццёвы досвед

Сярод іх — жанчыны, людзі з ВІЧ, ЛГБТК±персоны, палітвязні, нейраадрозныя і невідушчыя людзі ды іншыя. У сваіх гісторыях нашы героі і гераіні расказваюць, як будуюць стасункі, даюць рады цяжкасцям, адаптуюцца да жыцця ў Беларусі і ў эміграцыі, а таксама пра тое, што дае ім сілы і падтрымку.

Усе інтэрв’ю чытайце на нашым сайце, а тут дзелімся выбарам рэдакцыі за 2025 год:

1. «Зрабіце ўсё магчымае, каб даць майму сыну дазвол на пераход». Марыя пра прыняцце свайго трансгендарнага дзіцяці
2. «У турме кім я толькі ні быў»: Акіхіра пра беларускую талерантнасць і сваю маладосць за кратамі
3. «Калі б не ВІЧ, я не стаў бы тым, хто я ёсць цяпер»: Максім — пра страхі, любоў і пошукі сябе
4. «Цемнаце можна давяраць», — Яўген Брыцько пра жыццё невідушчага чалавека ў эміграцыі
5. «Я скраў у жонкі 20 гадоў жыцця»: гісторыя Сяргея, які зрабіў камінг-аўт у 43 гады

За 2025 год наш сайт наведалі больш за 92 000 разоў, а нашы матэрыялы перадрукоўвалі такія медыя, як Салідарнасць і Еўрарадыё. Дзякуючы гэтаму гісторыі людзей і іншыя важныя тэмы дасягнулі яшчэ большай аўдыторыі.

Запрашаем і вас чытаць нашы артыкулы і дзяліцца імі з блізкімі. А яшчэ нагадваем: калі вы знаходзіцеся ў Беларусі, нашы артыкулы можна чытаць і без VPN.

Самыя папулярныя матэрыялы 2025 года — не толькі інтэрв’ю!

1. Мізагінны слюр: незаўважная нянавісць да жанчын
2. «Навязваюць свой лад жыцця» і яшчэ пяць міфаў пра вегана_к
3. У Беларусі прыняты новы закон аб адказным абыходжанні з жывёламі. Разбіраемся, што з ім не так
4. «Мы — не нашыя дыягназы»: Лея — пра жыццё з памежным разладам асобы
5. Чаму засцерагацца — усё яшчэ «жаночая справа»?

Запусцілі ІншыКвіз: гуляем і разбураем стэрэатыпы разам

У 2025 годзе мы выпусцілі два цалкам беларускамоўныя квізы на YouTube пра роўнасць і недыскрымінацыю.

З аднаго боку, атрымалася займальная гульня на эрудыцыю, а з другога — адкрытая размова на самыя складаныя і часам нязручныя тэмы.

Але што мы ўсё распавядаем — глядзіце (і гуляйце!) самі: з сяброўкамі і сябрамі або самастойна!

Апублікавалі карысныя чэк-лісты для арганізатара_к мерапрыемстваў

Арганізатаркі мерапрыемстваў, усе сюды!

Нават калі інклюзія не з’яўляецца вашай асноўнай тэмай, усё роўна класна рабіць мерапрыемствы камфортнымі і прыязнымі для ўсіх удзельніцаў. Таму мы стварылі на сайце бібліятэку карысных матэрыялаў і дадалі туды чэк-лісты для арганізатара_к. Карыстайцеся!

• «Як ладзіць мерапрыемствы для людзей з ПТСР»
• «Стварэнне інклюзіўнай прасторы для нейраатыповых людзей»
• «Як арганізаваць kids-friendly прастору на мерапрыемстве»

Хочаце дадаць у бібліятэку матэрыял, якога тут яшчэ няма? Напішыце нам на пошту [email protected], і ён хутка з’явіцца ў бібліятэцы!

Правялі даследаванне і высветлілі, як медыя і НДА могуць узаемадзейнічаць эфектыўней і разам змяняць свет да лепшага

У жніўні — верасні 2025 года сумесна з Razam e.V. пры падтрымцы Беларускай асацыяцыі журналістаў мы зладзілі даследаванне «Як (не) супрацоўнічаюць медыя і арганізацыі грамадзянскай супольнасці (АГС): патрэбы, механізмы і прычыны».

Мы правялі 14 глыбінных інтэрв’ю і атрымалі 70 адказаў на анлайн-анкету. Вось некаторыя вынікі:

• Усім даводзіцца працаваць у дэфіцыце рэсурсаў. У АГС часта няма асобных супрацоўніц або бюджэту для камунікацыі з медыя, а медыя не маюць магчымасці паглыбляцца ў спецыялізаваныя тэмы праз абмежаваны час і дэфіцыт супрацоўніц.
• Медыя разглядаюць супрацоўніцтва з АГС як магчымасць атрымаць доступ да экспертак (80%) і знаходзіць цікавыя асабістыя гісторыі (75%). І гэта стварае win-win сітуацыю: тут патрэбы медыя супадаюць з тым, што могуць прапанаваць АГС.
• Асноўныя фактары паспяховага супрацоўніцтва: асабістыя кантакты, актуальнасць тэм, наяўнасць публічных экспертак і спікера_к, а таксама праактыўнасць АГС.
• І што вельмі цешыць: больш за 70% АГС і медыя зацікаўленыя ў развіцці супрацоўніцтва паміж сабой.

Больш падрабязна пра галоўныя складанасці і карысныя парады, што нам з усім гэтым рабіць, чытайце ў артыкуле на сайце ці ў поўным даследаванні.

Развівалі лакальную супольнасць у Вільнюсе

Мы ведаем, як складана можа быць у эміграцыі, таму ў 2025 годзе шмат працавалі з беларус_камі ў Вільнюсе. Каб людзі маглі наладжваць новыя сувязі і падтрымліваць адны адных, мы правялі 11 мерапрыемстваў, якія наведала больш за 100 чалавек.

Што мы рабілі? Знаёміліся на беларускамоўных нэтворкінгах, гулялі ў квіз, стваралі калажы і рыхтавалі мапу жаданняў на 2026 год.

Калі вы ў Вільнюсе, ведайце: мы працягваем арганізоўваць івэнты і ў 2026 годзе. Усе анонсы выходзяць у нашым тэлеграм-канале «Іншы Вільнюс». Пабачымся!

Планы на 2026 год

Фінансаванне ў 2025 годзе і, на жаль, у 2026 годзе значна зменшылася. Гэта прымусіла нас скараціць аб’ёмы дзейнасці (але не колькасць працы!), перабудаваць каманду і распрацаваць новую стратэгію на 3 гады.

Але нягледзячы на ўсе складанасці, мы маем надзею на рэалізацыю нашых планаў. І вось што мы задумалі:

1. Мы будзем працягваць нашую працу з валанцёркамі, каб больш моладзі атрымала магчымасць паспрабаваць сябе ў актывізме. Далучайцеся!
2. У сакавіку — чэрвені зладзім адукацыйна-ментарскі курс для беларусак «Базавы мінімум: навыкі, якія працуюць на цябе».
3. У красавіку рыхтуем ужо трэці Форум All Inclusive, каб абмеркаваць бягучы стан спраў у сферы інклюзіі і як мы можам на яго ўплываць.
4. На восень ужо задумалі паўтарыць наш улюбёны базавы курс для арганізатара_к мерапрыемстваў «Рабі смела!» у афлайн-фармаце.
5. Плануем развіваць і прасоўваць базавы анлайн-курс для самастойнага навучання «Курс на каштоўнасці» і нашую адукацыйную платформу.
6. У Вільнюсе штомесяц запланавалі правядзенне цікавых імпрэзаў для супольнасці. Далучайцеся да канала ў тэлеграме «Іншы Вільнюс», каб не прапусціць анонсы!
7. Будзем рыхтаваць новыя выпускі інтэлектуальнай гульні ІншыКвіз.
8. Таксама на працягу года ў нас запланаваны выхад розных матэрыялаў на тэмы роўнасці і недыскрымінацыі як на нашым сайце, так і ў Instagram, Telegram і TikTok. Падпісвайцеся на нас, каб не прапусціць карысныя матэрыялы!

Да сустрэчы на мерапрыемствах і ў анлайн-прасторы!

Як нас падтрымаць

Калі вам блізкія нашыя каштоўнасці і падабаецца тое, што мы робім, вы можаце падтрымаць нас рознымі спосабамі. Проста знайдзіце свой!

Дзякуем вам за любую падтрымку і дапамогу! Мы вельмі шануем вас і дзякуючы вам працягваем сваю працу!